Ban Animal Trading (BAT) het Dinsdag daarop aangedring dat die kop moet rol van Suid-Afrika se verteenwoordiger by die konvensie oor die internasionale handel in bedreigde spesies (CITES) omdat hy glo “gelieg het” (onwaarhede kwytgeraak het) oor die besluit van die departement van omgewingsake dat 1 500 leeuskelette voortaan uit Suid-Afrika na die Ooste uitgevoer mag word.

Smaragda Louw, BAT se stigter, het Dinsdag gesê sy het Mpho Tjiane, adjunkdirekteur van omgewingsake vir die ontwikkeling en inwerkingstelling van CITES-beleid, biodiversiteit en bewaring, verlede Woensdag gevra of die departement reeds ’n uitvoerkwota vir leeubeendere vir 2018 vasgestel het. Volgens haar het hy gesê “nee”.

Intussen het ’n brief van Edna Molewa, minister van omgewingsake, gerig aan Manketsi Tlhape, Noordwes se LUR vir landelike ontwikkeling, omgewing en landbou-ontwikkeling, aan nie-regeringsorganisasies en die media uitgelek. Daarin sê Molewa haar departement het vanjaar se kwota op 1 500 vasgestel.

Die brief is in die eerste week van Junie aan Tlhape geskryf. Louw het gesê sy is “woedend” oor dié leuen en is bereid om ’n beëdigde verklaring daaroor af te lê. “Waarom sou hy (Tjiane) hieroor ’n leuen vertel? Waarom lieg hy vir ’n organisasie wat veg vir die regte van diere? Dit is ongehoord. Tjiane behoort afgedank te word,” het Louw gesê. Louw het gesê as alternatief moet Tjiane aan ’n dissiplinêre verhoor onderwerp word.

Netwerk24 het vrae hieroor aan Tjiane gestuur. Hy het laat weet Albi Modise, woordvoerder van die departement, moet gekontak word. Modise het per WhatsApp gesê “hierdie soort vrae” mag nie aan Tjiane gevra word nie. Hy het nie op opvolgvrae gereageer nie. Dit is egter duidelik Modise het die boodskappe op sy foon gelees.

Louw meen Tjiane het dié leuen vertel om moontlik die leeutelers te beskerm of omdat hy die besluit op die huidige CITES-beraad wat in Genève gehou word, sou moes verdedig, as dit voor die tyd uitlek. Louw het gesê Suid-Afrikaners kan nie toelaat dat mense wat leuens vertel oor die lot van diere, oor die land se omgewing besluite neem nie.

Regs is Mpho Tjiane, adjunkdirekteur van omgewingsake vir die ontwikkeling en inwerkingstelling van Cites-beleid, biodiversiteit en bewaring, en sy kollega, Sonja Meintjes.

Die omgewingsorganisasie Blood Lions het Dinsdag in ’n verklaring gesê hy “verafsku” die departement se besluit om voort te gaan om met leeubeendere handel te dryf. Lede van dié organisasie probeer al vir die afgelope 21 jaar om die leeubedryf te sluit.

Die Trust vir Bedreigde Spesies (EWT) het op sy beurt gesê hy is “baie bekommerd” oor Molewa se besluit. Die EWT sê daar is geen bewyse dat deur met die beendere van geteelde leeus handel te dryf, stropery onder wilde leeus sal afneem nie. Volgens die EWT is daar groot verwarring oor die lotgevalle van “geblikte leeus”.

Die departement van omgewingsake besluit oor hul lotgevalle (of hulle gejag mag word en of hulle doodgemaak mag word vir hul beendere), terwyl die departement van landbou, bosbou en visserye na hul welsyn moet omsien.

Verskeie organisasies het die hutsmerk #EdnaMustFall getwiet. Intussen het die Dallas-Safariklub, een van die grootste jagklubs in die wêreld, in ’n brief aan die Professionele Jagtersvereniging van Suid-Afrika (PHASA) geskryf hy (die klub) sal nie vanjaar PHASA se jaarvergadering borg of dit bywoon nie. Die rede hiervoor is PHASA se standpunt ten gunste van geblikte leeujag.