Geblikteleeujag sal vanjaar voortgaan, al het die Professionele Jagtersvereniging van Suid-Afrika (Phasa) sy rug op dié bedryf gedraai.

Prof. Pieter Potgieter, president van die Suid-Afrikaanse Roofdiertelersvereniging (Sapa), het dít eergister in ’n verklaring gesê.

Na aanleiding van die opspraakwekkende dokumentêre rolprent Blood Lions het hy ook skerp gereageer op diereregte-aktiviste wat die openbare mening “uitbuit”.

Hy sê daar is ’n “aanslag” teen die jagbedryf en Sapa sal voortgaan om daarteen te baklei.

“Sapa glo vas in die integriteit van die leeubedryf in Suid-Afrika. Leeujag is wettig en maak ’n baie belangrike deel van trofeejag in die land uit.”

Leeujag word ook deur die Suid-Afrikaanse regering ondersteun en gereguleer.

Die regering het geen beperking ingestel op die jag van leeus in gevangenskap nie en is ook nie van plan om dit te doen nie, sê Potgieter.

Die bedryf het norme en standaarde waarvolgens dit funksioneer. “Al 12 leeuplase in die land is by Sapa geakkrediteer.

“Sapa is deeglik bewus van sy verantwoordelikheid teenoor wilde leeus en dra op vele maniere by tot die bewaring van dié diere. Sapa het byvoorbeeld ’n bewaringsfonds.”

Potgieter sê Sapa is daarvan bewus dat die Amerikaanse bewaringsagentskap se finale besluit oor die verhoogde bewaringstatus van die Afrikaleeu (wat op 23 Desember gepubliseer is), ernstige implikasies vir die jag van leeus in gevangenskap kan inhou. Die jagorganisasie is daarvan oortuig hy kan met die besluit saamleef en dat jagters hul leeutrofeë wel na Amerika sal kan uitvoer.

Potgieter sê Sapa is erg teleurgesteld in Phasa se besluit om sy rug op dié bedryf te draai.

“Dit is ’n klap in ons gesig.”

Phasa het einde verlede jaar gesê hy is ongemaklik met die jag van leeus in gevangenskap omdat “die openbare mening gedraai het téén dié vorm van jag”.

Potgieter beskuldig Phasa van skynheiligheid en wys daarop dat sommige jagters wat lede van dié organisasie is, ook buffels en renosters jag wat in gevangenskap geteel word. netwerk24