As ‘n mens terugkyk op die jaar wat verby is, was daar gebeure wat in die natuurlike omgewing plaasgevind het wat ‘n vonk aangesteek het. Dit het hewige debatte ontlok, protesoptogte aan die gang gesit, aanlynversoekskrifte laat posvat en Twitter- en Facebook-veldtogte begin.

Een so ‘n vonk wat ‘n veldbrand veroorsaak het, was die jagtog deur dr. Walter Palmer, ryk Amerikaanse tandarts en grootwildjagter, wat Cecil die swartmaanhaarleeu van Hwange in Julie vanjaar in Zimbabwe met ‘n kruisboog doodgeskiet het.

Honderde aanlynversoekskrifte is in Augustus teen Palmer begin en duisende mense wereldwyd (baie in Suid-Afrika) het dit onderteken. Hulle het gevra vir die uitlewering van Palmer aan Zimbabwe, waar hy hopelik gestraf sou word. Hulle het sover gegaan om daarop aan te dring dat sy praktyk in Minnesota gesluit word. Hy is ook by sy huis geteister waar woorde soos “moordenaar” met rooi verf op die motorhuis se deure gespuit is.

Hoewel Palmer nie aan Zimbabwe uitgelewer is nie, is hy waarskynlik deeglik daarvan bewus dat hy een van die mees gehate mense in die wereld is. Aktiviste vergeet nooit nie. S6 treiter Twitter-gebruikers Palmer steeds. Hulle breek gereeld op sy webblad in en sorg s6 dat hy nooit sal vergeet nie.

Cecil het die wereld weer aan die dink gesit oor trofee, sport- en biltongjag, veral in Afrika waar wild soveel werk skep as deel van die toerismebedryf. Begrippe soos “oneties” en “onvolhoubaar” het nuwe betekenis gekry. Mense vra hulle af hoe dit moontlik is dat trofeejag in dieselfde asem as bewaring gebruik kan word.

Op eie bodem word debatte gevoer oor die gonswoorde “volhoubare benutting”, wat ons eie Edna Molewa, minister van omgewingsake, so graag gebruik wanneer sy die handel in renosterhoring probeer regverdig. In 2016 word ‘n groot Cites-beraad in Johannesburg gehou en die internasionale oopstel van die handel in renosterhoring is op die agenda.

Lande wat bewaringsgesind is, lig reeds die wenkbroue oor hierdie Suid-Afrikaanse voorstel.

Die dokumentere rolprent Blood Lions het vanjaar ook opslae gemaak en die kwessie van geblikte leeujag in die kollig geplaas.

Die onetiese bedryf het lang tentakels en begin reeds wanneer leeuwelpies gebore word en mense toegelaat word om aan hulle te vat en met hulle te speel. Hier begin die geldmakery reeds. Welpies is oulik as hulle so klein is, maar dit is waar die doodskoot begin. Hierdie welpies word net geteel om in klein kampies gejag te word. Molewa het gou besef hierdie is ‘n warm patat en nou sit Senzeni Zokwana, minister van landbou, bosbou en visserye, met die probleem: Wat gaan word van 7 000 halfmak leeus wat geen bewaringswaarde het nie? Wat eens bestempel is as die koning van die diere het nou die status van ‘n plaasdier.

Daar is baie omgewingskwessies wat in 2016 aandag moet kry. Van die belangrikste wentel om ons minerale.

Terwyl ons soveel energie bestee aan groot politieke gebeure wat ons aandag aftrek, word ons land stuk-stuk opgemyn.